«Фергана өрөөнүнүн биргелешкен өнүгүүсүнүн жалпы стратегиясынын көз карашы

Фергана өрөөнүнүн биргелешкен өнүгүүсүнүн стратегиялык көз карашы 2025-жылдын 15-октябрында Фергана шаарында (Өзбекстан Республикасы) Биринчи Фергана тынчтык форумунун алкагында «Фергана өрөөнүнүн биргелешкен өнүгүүсүнүн жалпы стратегиясынын көз карашы» деп аталган биринчи панелдик сессия өттү.

Сессиянын модератору Кыргыз Республикасынын Президентине караштуу Стратегиялык демилгелер улуттук институтунун бөлүм башчысы Бермет Каниметова болду.

Кыргыз Республикасынын Президентине караштуу Стратегиялык демилгелер улуттук институтунун директорунун орун басары Нурлан Дарданов форумдун биринчи сессиясында чыгып сүйлөдү. Талкууга Борбордук Азия өлкөлөрүнүн алдыңкы эксперттери жана аналитикалык борборлордун өкүлдөрү да катышты.

Өзүнүн сөзүндө Нурлан Камалбекович Дарданов Фергана өрөөнү Борбордук Азиянын стратегиялык өзөгү экенин, анын туруктуу өнүгүүсүнөн Кыргызстандын, Өзбекстандын жана Тажикстандын социалдык-экономикалык туруктуулугу көз каранды экенин баса белгиледи. Ал чыр-чатактарды башкаруудан биргелешкен өнүгүүнү башкарууга өтүү зарылдыгын белгилеп, аймактын жалпы стратегиясын түзүү боюнча конкреттүү кадамдарды сунуштады.

Дарданов суу жана энергетикалык коопсуздук тармагындагы приоритеттерди аныктап, энергетикалык байланышты калыбына келтирүүнүн жана заманбап механизмдерди киргизүүнүн маанилүүлүгүн баса белгиледи.

«Кыргызстан пилоттук долбоорлорду иштеп чыгууда жана ишке киргизүүдө координациялоочу рольду өзүнө алууга даяр, – деп белгиледи Дарданов. – Практикалык интеграция жана өз ара ишеним аймактын туруктуу келечегинин ачкычы болот».